தமிழக ஆற்று மணல், மாநில எல்லையைத் தாண்டி எடுத்துச் செல்வதற்கு உடனடியாகத் தடை விதிக்க வேண்டும்

ஆற்று நீர் மலைகளிலும், பாறைகளிலும் முட்டி மோதி வரும்போது பாறைகளின் பகுதிகள் மணலாக உருமாறி ஆற்றுப் படுகைகளில் தங்குகின்றன. அந்த மணலானது வெள்ள நீரை உறிஞ்சி நிலத்தடி நீர்மட்டம் உயர துணை நிற்கின்றது; குடிநீர் ஆதாரமாகவும் விளங்குகிறது. அப்படிப்பட்ட மணல், விதிமுறைகளை மீறி பொக்லைன் இயந்திரம் மூலம் ஒரு மீட்டர் ஆழத்திற்கு மேலாக தோண்டி எடுக்கப்படுகிறது. தோண்டி எடுக்கப்பட்ட மணல் அரசுக்கு ஒரு யூனிட்டுக்கு ரூபாய் 520 கட்டிவிட்டு, நம் மாநிலத்து தேவைகளுக்கு பத்து மடங்கு கட்டணத்தில் விற்கப்படுகிறதென்றால், பக்கத்து மாநிலங்களுக்கு இன்னும் அதிக கட்டணத்தில் கடத்தப்படுகிறது. இந்த வகையில் பாலாற்றுப் படுகையில் மட்டும் கோடிக்கணக்கான ரூபாய் பெறுமானமுள்ள ஆற்று மணல் கடத்தப்படுவது அனைவரும் அறிந்த பகற்கொள்ளையாகவே நடந்து கொண்டிருக்கிறது.

பக்கத்து மாநிலங்களான ஆந்திரம், கர்நாடகம், கேரளம் போன்றவை தங்கள் மாநிலத்து ஆற்று மணல் வளத்தைக் காத்திட விழிப்புடன் இருக்கும் வேளையில் தமிழத்தில் மட்டும் சுரண்டப்படும் மணலில் 60 சதவீதம் எல்லை தாண்டிப் போகிறது; கடல் வழியாக மாலத் தீவுகளுக்கும் பயணிக்கிறது. இவற்றை உடனடியாகத் தடுத்திட, தமிழக ஆற்று மணல் மாநில எல்லையைத் தாண்டி எடுத்துச் செல்வதற்கு தமிழக அரசு உடனடியாகத் தடை விதிக்க வேண்டும் என்று காந்திய மக்கள் இயக்கம் வலியுறுத்துகிறது.